មុខសញ្ញាឆក់ទូរស័ព្ទ២នាក់ ត្រូវនគរបាលខណ្ឌដូនពេញ ឃាត់ខ្លួន
29-December-2018 | ដោយ ពលមនសិការ
ភ្នំពេញ៖ ជនសង្ស័យ២នាក់ ពាក់ព័ន្ធករណីលួចមានស្ថានទម្ងន់ទោសប្រើអំពើហិង្សា(ជិះម៉ូតូឆក់ទូរស័ព្ទដៃ) ត្រូវនគរបាលខណ្ឌដូនពេញឃាត់ខ្លួនកាលពីវេលាម៉ោង១និង១០នាទី ថ្ងៃទី២៩ ខែធ្នូ ឆ្នាំ២០១៨ នៅចំណុចផ្លូវព្រះសីហនុ កែងផ្លូវលេខ៥៥ ភូមិ៣ សង្កាត់ចតុមុខ ខណ្ឌដូនពេញ រាជធានីភ្នំពេញ។
លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញបានឲ្យដឹងថាជនសង្ស័យទី១-ឈ្មោះ មឿន ប៊ុនលី ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅ ផ្ទះជួល ផ្លូវលំ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ដែលជាអ្នកបើកម៉ូតូ ទី២-ឈ្មោះ សុខ ឆេង ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅ ផ្ទះជួល ផ្លូវ៣៦៩ ភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ដែលជាអ្នកធ្វើសកម្មភាពឆក់។
លោកអធិការបន្តថាមុនពេលកើតហេតុ ជនសង្ស័យ០២នាក់ ជិះម៉ូតូចំនួន០១គ្រឿង ម៉ាក HONDA DREAM C125 ផលិតឆ្នាំ២០១១ ពណ៌ខ្មៅ ពាក់ស្លាកលេខ ភ្នំពេញ 1AY-9266 បានធ្វើសកម្មភាពឆក់ទូរស័ព្ទដៃ ពីជនជាតិបរទេសម្នាក់ ភេទប្រុស អាយុប្រហែង៣០ឆ្នាំ កំពុងឈរនិយាយទូរស័ព្ទ បានសម្រេច ពេលនោះជនរងគ្រោះបានស្រែកឆោឡោ ហើយត្រូវបានកម្លាំងល្បាតរបស់ខណ្ឌ/ប៉ុស្តិ៍ ដែលនៅក្បែរនោះឃើញហេតុការណ៍ ក៏បានដេញប្រផាប់ចាប់ប្រផីង បណ្តាលអោយជនសង្ស័យ០២នាក់ ភ័យញ័ររេចង្កូត ប៉ះជាមួយរថយន្តដួលម៉ូតូ ហើយត្រូវបានប្រជាពលរដ្ឋនៅក្បែរនោះព្រួតវាយបណ្តាលអោយជនសង្ស័យម្នាក់របួសក្បាល នៅចំណុចផ្លូវលេខ២៨៨ កែងផ្លូវលេខ៦៣ ភូមិ៥ សង្កាត់ចតុមុខ ខណ្ឌដូនពេញ រាជធានីភ្នំពេញ បន្ទាប់មកកំលាំងយើងបានអន្តរាគមន៍ភ្លាមៗ ដោយឃាត់ខ្លួនជនសង្ស័យ០២នាក់។
វត្ថុតាងចាប់យកៈ ម៉ូតូមួយគ្រឿងម៉ាកHONDA DREAM C125 ផលិតឆ្នាំ២០១១ ពណ៌ខ្មៅ ពាក់ស្លាកលេខ ភ្នំពេញ1AY 9266 ។ ជនរងគ្រោះមិនស្គាល់ឈ្មោះ ភេទប្រុស អាយុប្រហែល៣០ឆ្នាំ ជនជាតិបារាំង។(មិនបានមកដាក់ពាក្យបណ្តឹង)។ សម្ភារៈបាត់បង់៖ ទូរស័ព្ទដៃមួយគ្រឿងម៉ាក sansung ពណ៌ទឹកប្រាក់ (ត្រូវបានជនសង្ស័យបោះចោលតាមផ្លូវ ពេលកំពុងជិះគេចខ្លួន។
បច្ចុប្បន្នសមត្ថកិច្ចជំនាញកំពុងប្រើប្រាស់វិធានការជំនាញសួរចម្លើយ បន្តរកបក្ខពួកនៅសេសសល់ ព្រមទាំងប្រវត្តិសកម្មភាពប្រព្រឹត្តបទល្មើសតាមភូមិសាស្ត្របណ្តាខណ្ឌផ្សេងៗកន្លងមក និងក៏សាងសំណុំរឿង តាមនិតិវិធី ដើម្បីបញ្ជូនជនសង្ស័យទៅសាលាដំបូងរាជធានីភ្នំពេញ ផ្តន្ទាទោសតាមច្បាប់ ៕
ចំនួនអ្នកទស្សនា
- ថ្ងៃនេះ9371
- ម្សិលមិញ11441
- សប្តាហ៍នេះ39201
- ខែនេះ154351
- ឆ្នាំនេះ154351
- សរុប20596807